1Ch 21 | NdeIBE | STEP | USathane wasemelana labako-Israyeli njalo wafuqela uDavida ukuba abale abantu bako-Israyeli.

1 Chronicles 21

UDavida Ubala Amabutho Empi

1 USathane wasemelana labako-Israyeli njalo wafuqela uDavida ukuba abale abantu bako-Israyeli. 2 Ngakho uDavida wathi kuJowabi kanye labalawuli bamabutho, “Hambani liyebala abantu kusukela eBherisheba kusiya koDani. Libeseliphenduka lizongitshela ukuze ngazi ukuthi bangaki khonale.”

3 Kodwa uJowabi waphendula wathi, “Sengathi uJehova angandisa amabutho akhe ngokuphindwe okwedlula ikhulu. Mhlekazi wami nkosi, kambe kabasibantu benkosi yami bonke laba? Inkosi yami ifunelani ukukwenza lokhu? Kungani ithanda ukwehlisela icala phezu kwabako-Israyeli?”

4 Loba kwakunjalo, uJowabi wakhulelwa yilizwi lenkosi, ngakho uJowabi walibhoda lonke elako-Israyeli wasebuyela eJerusalema.

5 UJowabi wafika wabikela uDavida inani lamadoda ayengalwa empini: Kulo lonke elako-Israyeli kwakulamadoda ayisigidi lezinkulungwane ezilikhulu ayelakho ukuthi angayiphatha inkemba, kubalwa labayizinkulungwane ezingamakhulu amane alamatshumi ayisikhombisa koJuda.

6 Kodwa ekubaleni kwakhe uJowabi kazange ahlanganise abaLevi labakaBhenjamini, ngoba umlayo wenkosi wawumnenga. 7 Kanti njalo lowomlayo wawuyisono phambi kukaNkulunkulu, lakanye wamjezisa u-Israyeli.

8 Ngakho uDavida wasesithi kuNkulunkulu, “Ngonile kakhulu phambi kwakho ngokwenza lokhu. Ngakho, ngiyakuncenga, susa umlandu lo encekwini yakho. Ngenze ubuwula obukhulu kakhulu.”

9 UJehova wakhuluma loGadi, umboni kaDavida, wathi: 10 “Hamba uyetshela uDavida ukuthi, ‘Nanku okutshiwo nguJehova: Ngikunika ukuthi ukhethe phakathi kokuthathu. Khetha okukodwa okumele ngikwehlisele khona mina.’ ”

11 Ngakho uGadi waya kuDavida wathi kuye, “Nanku okutshiwo nguJehova: ‘Zikhethele wena okufunayo: 12 iminyaka emithathu yendlala, loba izinyanga ezintathu zokududulwa uxotshwa yizitha zakho, ngenkemba zazo zikukhulela, loba izinsuku ezintathu zokumelana lenkemba kaJehova, kuyikuthi kuyabe kuyisifo elizweni, ingilosi kaJehova iletha incithakalo kulo lonke elako-Israyeli.’ Ngakho, khathesi khetha ukuthi ngifike ngithini kulo ongithumileyo.”

13 UDavida wathi kuGadi, “Ngisosizini olukhulu kakhulu; kungangcono ngizinikele ezandleni zikaJehova, ngoba umusa wakhe mkhulu kakhulu; kodwa unganginikeli ezandleni zabantu.”

14 Ngakho uJehova wathumela isifo ko-Israyeli, kwafa amadoda ayizinkulungwane ezingamatshumi ayisikhombisa ko-Israyeli.

15 Njalo uNkulunkulu wasethumela ingilosi ukuba iyechitha iJerusalema. Kodwa ingilosi ithe isakwenza lokho, uJehova wazisola ngencithakalo eyayizakwenzakala wahle wakhuza ingilosi eyayizabhubhisa abantu wathi, “Kwanele! Yekela.” Ingilosi kaJehova ngalesosikhathi yayisimi esizeni sika-Arawuna umJebusi.

16 UDavida wakhangela phezulu wabona ingilosi kaJehova imi phakathi kwezulu lomhlaba, iphethe inkemba esandleni sayo phezu kweJerusalema. Ngakho uDavida labadala, begqoke amasaka, bawa phansi ngobuso.

17 UDavida wathi kuNkulunkulu, “Angithi yimi engithe akubulawe amadoda okulwa na? Yimi engonileyo ngadala isono. Laba abasilutho yizimvu ezilandelayo. Benzeni? O Jehova Nkulunkulu wami, isandla sakho asiwele phezu kwami labendlu yami, kodwa akuthi isifo singasali ebantwini bakho.”

18 Ngakho ingilosi kaJehova yathuma uGadi ukuthi ayetshela uDavida ukuthi ayekwakha ialithare likaJehova esizeni sika-Onani umJebusi. 19 Lakanye uDavida walalela ilizwi elakhitshwa nguGadi ngebizo likaJehova.

20 U-Onani esabhula ingqoloyi, wanyemukula wabona ingilosi; amadodana akhe amane ayelaye acatsha. 21 Kwasekufika uDavida, kuthe u-Onani embona, watshiya ukubhula wayakhothamela uDavida elokhu ebusobukhothamele phansi.

22 UDavida wathi kuye, “Ake ungivumele ngibone isiza sakho sokubhulela amabele ukuze ngakhe i-alithare likaJehova, ukuze isifo esisebantwini simiswe. Ngithengisela sona ngentengo yaso egcweleyo.”

23 U-Onani wathi kuDavida, “Sithathe! Inkosi yami kayenze lokho ebona kuyithokozisa. Khangela, mina ngizaletha izinkabi zomhlatshelo wokutshiswa, lemibhulo yokubhula izakuba zinkuni, ingqoloyi izakuba ngumnikelo wamabele. Konke lokhu ngiyakunika.”

24 Kodwa uDavida wathi ku-Arawuna, “Hayi, ngifuna ukuthenga ngentengo egcweleyo. Angiyikuthatha okuya kuJehova okungokwakho, angiyikunikela umhlatshelo wokutshiswa engingawuthenganga.”

25 Ngakho uDavida wanika u-Arawuna amashekeli egolide angamakhulu ayisithupha ethenga leyondawo. 26 UDavida wakhela uJehova i-alithare kuleyondawo wanikela imihlatshelo yokutshiswa leyobudlelwano. Wakhuleka kuJehova, uJehova wamphendula ngomlilo uvela ezulwini phezu kwe-alithare lomnikelo wokutshiswa.

27 Ngakho uJehova wakhuluma lengilosi, yona yasibuyisela inkemba yayo esikhwameni sayo. 28 Ngalesosikhathi, uDavida esebonile ukuthi uJehova wayemphendule esizeni sika-Onani umJebusi, wanikela iminikelo kuleyondawo. 29 Ithabanikeli likaJehova, elalakhiwe nguMosi enkangala, kanye lealithare lemihlatshelo yokutshiswa ngalesosikhathi kwakusendaweni ephakemeyo eGibheyoni. 30 Kodwa uDavida wehluleka ukuya khona ukuze abuze kuNkulunkulu ngoba wayesesaba inkemba yengilosi kaJehova.